مساء الورد يا طشي

مَسَاءَ الوَردْ يا طَشِّي

ورَشِّي والهَوَى الجَيَّاشْ

معي لَكْ دَينْ في رِمشِي

وفي قلبي معي لَكْ كاشْ

ومِن مِلحِي ومِن عَيشِي

لَكَ العَهدَ الذي لَكْ عاشْ

ولَو باقِي زَعَلْ أَو شِي

أَنا حاضِرْ.. وما شَسْخَاشْ

مُحَال انسَاكْ يا نَقشِي

بصَفحةْ خافِقِي الرَّعَّاشْ

أَنا في غَيبَتَكْ أَعشِي

إِذا مَنْتَشْ معي ما رَاشْ

دُمُوعِي شَوقَها يُفشِي

بسِرَّكْ لَو شِبِعْ طِنَّاشْ

وزَادَ الشَّوقْ في رَعشِي

وظامِي الشَّوقْ ما يِرْوَاشْ

أَنا حارَبْتْ بَكْ جَيشِي

وسُلطَةْ دَمعِيَ الرَّشَّاشْ

وخَلَّيتَكْ على عَرشِي

فِرَاشَكْ مِن سَنَا وارْيَاشْ

إِذا حُبَّكْ سَفَرْ شَمْشِي

على كَفَّ العَدَمْ واللَّاشْ

ولَو حتَّى على نَعشِي..

مَعي لَكْ شَوقْ ما يِنسَاشْ

جَفَاءَكْ شِي وحُبَّكْ شِي

وحُسْنَكْ آخِرَ الإِدهاشْ

مَصِيرَ المُرتَشِي يِرشِي

ومَن عاشَ الخُدَعْ يعتَاشْ

فلَو قَصْدَكْ مَعي تِمشِي

طَريقَ العاشِقَ الغَشَّاشْ

أَنا أَنكَرْتْ بَكْ عَيشِي

إِذا غَيَّبْتْ مَعْرِفْناشْ

حَبيبي.. زَادْ بَكْ طَيشِي

ومَن مِثلَ المُحِبْ لَو طاشْ!

أَبَاتَ اللَّيلْ كالمَغشِي

مُرَاعِي لَحظَةَ الإِنعاشْ

أَضُمَّكْ طَيفْ فِي فَرشِي

وأَتْسَاقَطْ شَجَرْ وَاْعشَاشْ

وأَتْقَلَّبْ على جِمْشِي

كأَني جُرحْ فَوقَ الشَّاشْ