أسفة جدا

أسفة جداً

بعتذر

اللي عشته معاك دفعني

لأني أمشي

وما ألتفتش

السنين عدت وطالت

والذكريات

ولا مرة قالت:

الحكاية ما انتهتش

ارجعي لبيتك وناسك

واكسري عِندك وكاسك

ياما قالِك

واعتذر لِك

واللي عشقان.. ما يكابرش

اللي حاوطوني ف بعادك هَمهُم

ما ابعدش عنهم

ولا اخيّب ظنهم

كانوا بيقولوا عليك.. فيك اللي فيك..

اسمع واسكت

كان خيالهم يحبُك الحيلة بضفايري

وافتكر أخر عمايلك.. أعند كمان

وأسمع وأسكت

مش عشانهم

بس لشريط من قساوة شفته منك

رغم حبي

كان..

من الصعب اني ارجع

بس عدى العمر بيا

واشتياقي..

كل يوم بيخدني ليك.. في خيال.. تلاقي

بقيت ف حيرة من حنيني

خطوة تسبقني إليك

وخطوة ترجع مستحية

مع إني هي.. هي هي..

دي البنية

اللي ليها تار عنيد

واللي أشواقها عتية

غصب عني

قلبي قال لي

أعتذر لك

بعتذر