بفكر أجيلك
أنشِف دموعي، وألمْلِمْ أسَاك
مين ليَا سِواك؟!
تشتاق له.. يجيلَك؟
بفكر أجيلك
أخبِيك في قلبي
وأغطيك بجفني
وفوق ضهري اللي محنِي..
أحنِي لَك وأشِيلَك
بفكر أجيلك
ويا تيجي معايا، يا بخُطري أسلم
وأكون لك أسيرك
بفكر أجيلك
وأخُدْلك معايا
زِوَادِة حنِين
تبقالَك سواقي
وبواقي البواقي.. لِبقية السنين
وحمولها العِجَاف
تِروِي بها البوار
وشَحِيح الأمان
وزرعك وطيرك
بفكر أجيلك
أتشعبط في قلبك
وأسْتَطعَمْ بِعِنبك، ونَبْتَك وتِينَك
وضِلِة نَخِيلَك
بفكر أجيلك
أسْعَد بيك وقلبي
يدُوق عَذبْ شَهدَك
ويغطس في نيلك
بفكر وفِكرِي
حارم جفن عيني
لو انُه يطاوعني ويغَمَضْ في ليلي
خايفة البُعد يغلِب
حنيني وحنينك
ولا أنتَ تجيني
ولا أقدر أجيلَك!
والفُرقه، تِطَوِّل
تِحَوِّل ف شوقنا
يشقيني هوايا
وتشقىَّ
بِسَهَرَك
وسُهدك
وليلَك