يا دمعة بكَّاها الظنون
طال المثول والجفون..
نشفت.. ما عادش نحيب
صعبان عليا الهوى
يرحل مع الميامين!
راح اللي راح والدموع..
مِن امتى جابت حبيب؟!
الأرض غرقت هوان..
واتبدل.. زمان بزمان
انصاص رجال وأشكال
حِملان مع خرفان
يا عيني دمعك نِشف
ولا جمودُه أنين؟
حنقول لمين يا هوى
ومين ه يسمع مين؟
احكي يا قلب الضنى
عن غُربة الرياحين
يا هلترى يا اللي جاي
حتجيب معاك الفجر
يهدينا شوق وحنين؟
ولا يهادينا سُهاد..
ويزيدنا حِمل ضنين؟!
حنقول لمين يا هوى
ونشيل هوانا لمين؟
احكي يا قلب الضنى..
عن غُربة الرياحين