على كتف الزمان.. الهوى..
عدى بلا أنسام
وما نابنا ف مداهم سوى..
أشواق.. في ليل.. وآلام
يا هلترى اللي جاي
ح يشذ عن يومنا
والا ما بين العباد.. صار خلخله وفصام؟!
ما فيش ع الكراسي بشر،
إلى مَا لا نهاية دام
وكل راعي مُدان،
لو مد أيد للصهاينة،
وعمل عهود وسلام
وصاحبنا يطيب ثراه
في عِز فرح الهوى..
زرع الآهات في القلب
كامب كامب وما ليش..
فيها أيادي وذنب
آخر عهودنا بيه،
لما شيطانُه قال:
لمَلِم كبار الكلام والعلم والكراس
دَاسهم غرورُه جماعة
ودَاس ما همُه.. داس
فخرج انفجار الحال..
كرسي ف كلوب عليه.. سقاه بنفس الكاس
طال الأمد والآه.. حَجَرْ كتير آمال
أتحجرت لحوال.. والصَمت راح يحتال
عَ الخايبة أيامي
قولي اعمل إيه يا خال
ازاي وأنا المسجون.. من ابن اللذينا رُغال
ترمح بي أحلامي؟!
آخر عهود الهوى، هوى
والكل استحى منا
فاتنا لضمير فينا صبأ
راح وانسلخ.. عنا
طال الأمد والملل.. لساه مِصاحبنا
يا لايمين اللي خان.. خُنتم كمان انتم
الكل منكم مُدان.. مَهمَن تَعَنتم
وان كان ع الصراحة بقى،
كل المياه بأبأه.. طالت وريد الدم
يا طير يا شارد تعالى
لملم هواك واتلم
طال الأمد والوطن..
معكوك.. وحالُه هم
اقفل هويس النِخاسة
وبلاد.. حَلِيفَه وغم
وجوز أمك قولُه لا يمكن،
ما أقدرش أقولك عم
تطبيع.. والوضيع اهو غار
واتكَشِفِ المستور..
يُمهل ما يهمل يا بايع..
لعرض.. وأرض.. وغاز.