الدنيا فيها ما فيها

الدّنْيَا فِيهَا مَا فِيهَا

فِيهَا وفِيهَا وفِيهَا

فِيهَا عِبَرْ ودرُوسْ

سَمّ فْ عَسَلْ مَدْسُوسْ

وبِتِنْشَرَى بِفْلُوسْ

والْكُلْ مَاسِكْ فِيهَا

فِيهَا الْقَوِي مَحْبُوبْ

لَوْ حَتّى لابِسْ تُوبْ

الظُّلْم بَسْ يَا دُوبْ

مَا هُو دَا اللّي سَايِدْ فِيهَا

فِيهَا الضّعِيفْ مَهْضُومْ

والْحلْم شِيءْ مَعْدُومْ

وازّايْ عَايِزَهَا تدّوُمْ

والظّلْم سَايِقْ فِيهَا

فِيهَا كَمَانْ أَفْرَاحْ

للّى تِعِبْ وارْتَاحْ

واللّي حَيَاتُه كفَاحْ

بِيحَقّقْ الأَحْلَامْ

فِيهَا كِتيرْ أسْرَارْ

واللّي لَدِيِهْ إصْرَارْ

بِيْكُونْ وَلَا الإِعْصَارْ

وبِيِهْزِمْ الآلامْ

فِيهَا الأَمَل مَوْجُودْ

فِي رَبّكْ الْمَعْبُودْ

نِتْخَطّى أيْ سدُودْ

نِقْضِي عَلَى الْأَحْزَانْ

فِيهَا دَا خِيرْ ودَا شَرّْ

مَا هِي دِي طِبَاعَ الْبَشَرْ

لَوْ ظُلْم فِيهَا انْتَشَرْ

فَالْعَدْل فِيهَا كَمَانْ

الدُّنْيَا زَيْ الْمُعَادْلَةْ

بَشَرْ ظَالْمَة وبَشَرْ عَادْلَةْ

وإنْتَ عَلِيكْ بِالْمُفَاضْلَةْ

تِحَدّدْ لَكْ مَكَانْ