هاتلك فرخه ... من غير ريش
و تكون غاويه شرب حشيش
هاتلك ديك ... ويكون مسطول
سكران ... ومدهول علطول
شوف لك نمله ... بنت بنوت
و مخطوبه .. لدبور هلفوت
وخروف وزنه ... عشر أرطال
و معزه ..يكون مشيها بطال
ماشيه تبدل في الأحبااب
و مسجله يا حبيبي أداب
وطلاسم ... وكتاب تعاويذ
و أبداء فوراً ... في التنفيذ
هاااات الفرخه ... وأم الديك
و أحشيهم .. يا حبيبي فريك
فك النمله ... من الدبور
وأخطبلها ... صرصار أمور
والمعزه ... كفياها ذنوب
حجبها ... وخليها تتوب
بعد ما تخلص بقى من دول
تعاويذك ... تبداء علطول
حضر بيهم ... ملك الجان
و قولوا يا بيه انا جالي جنان
جاوب على أسئلتي أوام
ريحني ... وخليني أنام
أمتى الحلم ... هيصبح علم؟؟
أمتى هنخلص بقى م الظلم؟؟
أمتى اللحمه هتبقى رخيصه؟؟
هي صحيح أسئلتي عويصه؟؟
أمتي شمالنا هيبقى يمين؟؟
أمتى التاجر ... يبقى أمين؟؟
أمتى العيان ... يبقى سليم؟؟
أمتى ... هينصلح التعليم؟؟
أمتى ... الحاكم يبقى كريم؟؟
وهي صحيح ... نسوانا حريم؟؟
سيبك ... دي أسئله فرعيه
أمتى الوالي... هيرضى عليا؟؟
وأبقى قابلني بقى يا فكيك
لو شمهورش ... رد عليك