حاصل ضرب بياده جسمك
زائد ... محضر شايل أسمك
زائد فيش مضروب يا شاويش
جواه سابقه ... وحرز حشيش
زائد ... نظره بكل صرامه
ناقص ... نسبه كبيره كرامه
زائد حفله ... في التخشيبه
ويا مسجل ... يعمل عيبه
زائد ... لفه في قلب محاكم
ويا كلابش ... في أيدك حاكم
زائد ... حبس كبير هيضمك
شتم وسب ... لأبوك ولأمك
نظرة حيره في وشك ظاهره
كل دا ليه لهتاف في مظاهره؟؟
حاصل ضرب . لحزن ونيله
مقسوم... على أفراد العيله
رسم بياني ... لحسره وحيره
أقفل بقك ... فضها سيره
عايز تعرف
أيه الحل؟؟؟
فكر .. وأعصر مخك عصر
تلقى الحل .. أن أنت في مصر