عمري ماتصورت إني
يجي يوم مقدرش اغني
لو سكت ف يوم ضروري
تعرفي كان غصب عني
لسه هحكي عن أمالي
حلمي فيكي والتمني
لسه فيكي ألف حاجه
تستحق أديها فني
لسه فيها
حاجه حلوه
رغم إن الحلو قل
لسه فيها شئ مسكر
رغم إن العيشه خل
فيها واحد لسه مؤمن
إن ضيقته ليها حل
وإن حقه بكره راجع
م اللي هانه ف يوم وذل
فيها واحد رغم شيبته
عمره مايقضيها نوم
لسه قادر إنه يدعي
لسه بيصلي ويصوم
لسه أيده قادره تضرب
ألف دقه بالقادوم
فيها واحد رغم ضيقته
لسه بيشحَّت هدوم
فيها واحد
لما يغلط
عمره ما بيركب عناده
فيها واحد كل همه
يسعى ويعلم ولاده
إن حب الأرض واجب
إن عشقه يكون بلاده
فيها جندي لسه واقف
صبعه ثابت
فوق زناده
لسه فيها حاجه حلوه
رغم ان الحلو قل
لسه فيها شيء مسكر
رغم ان العيشه خل
لسه فيها
واد صعيدي
يعني فيها ولاد أصول
فيها صاحب فكر واعي
عقل بيخاطب عقول
واما تقسي الدنيا يقدر
يبقى وقت الشده غول
لسه فيها حد قادر
ينصر الحق ويقول
لسه فيها حاجه حلوه
رغم إن الحلو قل
لسه فيها شئ مسكر
رغم إن العيشه خل
لسه فيها لما نحزن
حد قلبه بيواسينا
واما كل الدنيا تقسى
إيده بتطبطب علينا
أيده وقت الشده ماسكه
متفارقش ف يوم أيدينا
كتفه دايما جمب كتفي
مهما رحنا ولا جينا
لسه فيها
حاجه حلوه
رغم إن الحلو قل
لسه فيها شئ مسكر
رغم إن العيشه خل
فيها شاعر لسه فاتح
للمعارض له بريده
عمره مابيهدم لبيته
أو يكرر أو يعيده
لسه فيها حد مادد
للغريب بالود إيده
لو غيطانك يوم هتنشف
يروي أرضك
من وريده