ياكبر فقدك في عيوني وانا اشوف
كن الفضا اسدل .. ب عيني ظلامه
همي كبر واستوطن بداخل الجوف
وشاهق بي الحرمان .. هم وملامه
الدمع في عيني غدى اليوم مذروف
يهطل حزن من فوق عال الغمامه ..
اللي يهز إصفوف لا صارت إصفوف
فارض على كل .. الجميع احترامه
مامات لي رجال يرجي بنا ضعوف
ماتت .. مقاليد .. الزعامه .. زعامه
ومامات لي زيزوم ترفع له كفوف
كرامةٍ .. ياحلوها .. من .. كرامه
رجلن حشيمٍ بالمواجيب موصوف
إمقدرن .. عند .. النشاما .. مقامه
ياوجد حالي لا غدى الهم لافوف
لاهبت الضيقه .. تصوب .. سهامه
كني على فرقاه ب اللون مخطوف
لو كابر .. الغازي .. بوجهه .. علامه
يسهر الياما يصبح الصبح ويشوف
وتسد .. نفسه .. عن لذايذ طعامه
ماعاد لي شفٍ ولانيب مشغوف
وعيوني .. اللي تنظر .. اصغر ايتامه
ادله مع الافكار واهيم وانوف
ماكني .. الا فاقدن .. لي إبتسامه
مرحوم يلي بالمواجيب معروف
الطيّبه .. مرجاه وغاية .. مرامه
يالله عساه بجنة الخلد مخلوف
ويالله عسى الجنه .. نزايل إعظامه
مامات لي رجال يرجي بنا ضعوف
ماتت .. مقاليد .. الزعامه .. زعامه