تصحى تدور على اخبار القلق والحروب
بعد الفريضة تجدّ الجد للمشورة
مدارس اطفال وزحام وضجيج وكروب
واشياء تدعيك للعنة وللمسخرة
وتشوف كم مقطعٍ عابر على اليوتيوب
رئيس مخلوع .. تيارات .. لعبة كرة
الاتهامات في كل النحي والدروب
والانقسامات حتى عند كيس الذرة
الصقر ينفض جناحه والجناح معطوب
والببَّغا يلعن الهدهد على القبَّرة
وابليس يضحك على وجه الغبي والكذوب
ويعلم الحية الرقطا على السمسرة
عصابةٍ كنها لا دبرّت للهروب.
حمرٍ من الوحش لا فرّت من القسورة
وتخش في موجة اوراق العمل في قروب
كله قناعات معروفة ومستنكرة
وما بين لدغة زميل مكللة بالذنوب
واحساس فراش مستوحى من الشنفرة
تاخذ بعضْك وتقفي عجل من كل صوب
ويعجنك حر الظهيرة والطريق غبرة
واحلامك تفر ما تلقى بصدرك جيوب
تقص رحلة ندمها تذكرة تذكرة
وتغييييب في زحمة الاقدار لين الغروب
ترجع بَعَدْها وكن الروح مستعمرة
لا انت بشمالك شمال ولا جنوبك جنوب
طاااااافي لو انك بقلب الليلة المقمرة
وهكذا تلبس العادة ثياب الهبوب
بين الرضا والغضب والصمت والثرثرة
يتصارع الفكر والروتين صفق وحروب
والفجر اشيّع ضحاياهم على المقبرة