ياذيب ياذيب يالي تكتب وتقرا
اخذت قولك ومضمونه وحللته
والشعر سلعه ثمينه ماهي بتشرى
وبيطار علمك على التاريخ سجلته
مرات اقول انت مجرم تنحر وتفرا
ومرات اقول انت طب الجرح وعللته
مير الصحيح انت حيد الطيب والمذرى
تنطق عن الكل وتجاوب على اسئلته
والوقت هذا مساري كلها غدرى
والنور ياعين ساري يوم خايلته
كلي وكل البشر تشكي من المسرى
وتغريب الافكار ظاهر في معاملته
ياذيب تغريبنا يمشي على مجرى
علمان وارباب مال الحقد حاملته
والمشكله في عقول العالم القشرى
الي تصدق سفيه القوم واجللته
لكن حنا بعسر الوقت واليسرا
بالحق ننقطق لو العالم تجاهلته
والحر لعداه لايخنع ولايضرا
والموت بالعز نعم ونعم طاولته
والحاكم الي منه مانعدم البشرا
يفصل وهو يعلم الخافي وماقلته
حنا رفضنا القهر والظيم والعسرى
وتهديد فينا طبول القوم طبلته
وتعتيم للحق خلا عقولنا تترا
فينا السموم وغدا بالحق جاهلته
ياذيب ماعقبت لك بالضما خبرى
المزنه الي مطرها حلم خايلته
الصبر زين وبشيره والوعد بكرا
والخير ربك يسوقه يومك املته
خابرك ياذيب دايم دوم فيك احرا
الصدق ياذيب واسمع ويش انا قلته
ابنصحك وانته اخبر مني وادرى
لكن واجب علي النصح ماحتلته
كان انطفت نار فتنه شبت الاخرى
وماعاد تاخذ سداد الكيل لاكتلته
ثم ننكب مثل نكبت قيصر وكسرى
ويهد باب القبايل كف غايلته
ولاتنطفي كان شبت نارنا الكبرى
ويجيك من كل ملة شكل شاكلته
وابنائنا والنساء ادميهم هدرى
ونقول يازين مبنى العود وعللته
ان كان للشر قايم ثار له واغرى
لاجعلك اتكون منهو جاوب اولته
لو هو عليك وعلي الموت مايدرا
ولاعلينا هلا بالموت واعجلته
مير البلا بالرضيع ومنحر العذرا
يغتالهم من لهيب النار واكلته
حدثتك ابخوف حين الليله الغبرا
والحلم كاني عرفت العلم أولته
وان صاح صياح صحنا صيحةٍ كشرا
الصيحه الي شجاع القوم جفلته