من بعَد كدّ وسهر ذيك الليالي والسنين
عانقت أرواحنا أحلامها بعد انتظار
صارت الأحلام واقع نحمد الله كلّ حين
في عطاه أجزل وبدّل داجياتٍ بالنهار
كم سهرنا من ليالي نطرد الحلم الثمين
نرتجي واقع عظيم وما عليه أيّة غبار
كم تعبنا كم بكينا ووجهنا أمسى حزين
ثمْ مسحنا دمعنا... ما لاق فينا الانكسار
نغرس ونبذل ونسقي بكل وقت وكل حين
نبغى غرس اليوم يملي بكرة بكل الثمار
ستة سنين تعبنا عشنا فيها مكافحين
نرخص الغالي ونكتبها حكاية انتصار
راحت الأيام وراحت عقبها ذيك السنين
كم تحمّلنا وصبرنا وكم تجرّعنا المرار
ما تعوّدنا نبيع أحلامنا... ومتفائلين
طبعنا نوصل أمانينا بعد طول انتظار
رحلة الأحلام صعبة بس تسهل باليقين
والأمل بالله على أنه قادر يحلّي المسار
حلم ماضينا غدا واقع، غدا بين اليدين
نحلم أحلامٍ كبيرة... هم كذا كلّ الكبار
طالب البارح غدا دكتور وفخر الوالدين
يا عسى فرحة أهلنا دايمة وتملي الديار
ما نوفّي حقهم والله علينا ذاك دين
يا عسى ربّي يجازيهم بجناته قرار
بعد فضل الله علينا ثمْ دعاء الوالدين
كانت الرفقة في ظلمتنا مثل شمس النهار
والصديق اللي معه دايم مصاعبنا تلين
والله أن ندعي له بسرّ وْندعي له جهار
القسم قلناه ونسانا تعب كل السنين
والمحاجر دامعة والكون يغشاه الوقار
ربي يجعلنا على قد الأمانة ومخلصين
ويجعل يدينا بفضله جابرة لكل انكسار
إن بلغنا حلمنا ف بفضل ربّ العالمين
جعلنا للي بعدنا في لياليهم منار
وجعلنا دايم على لمس الأماني قادرين
وجعلها دايم ليالينا بيتبعها نهار