قم يانديبي هات من نسل ريمات
خمسٍ على طوي الفيافي هميمات
وإحذر تجيب إلاّ الفروخ الأصايل
ولا تجب شن فيه قاصر وطايل
عليك بالجهم، الخفاف الحراير
الذاربات، الزاهيات، الجراير
والزور كنّه يوم أشوفه، بعيني
كاسي ٍ على وجهه، خلاف اليديني
بتر، الفخوذ، محجّلات الأيادي
ياما حلا، بخشومهن، الفرادي
قرّبهن ودوّر، ربوعن يعرفون
ركّابة ٍ، مع كل درب ٍ، يدلوّن
حوفوا عليها يالمناديب، هالحين
بأكوارها، وخروجها ودّلها الزين
عشر الدقايق، تآ صلون الجبيلة
من دار أبو تركي، سقتها المخيلة
والرُبع، يوصلكم، بلاد المعّمر
امشوا مع السوق الموالي على البر
ولاغلّقت ثلثٍ، فطالع بعينك
تشوف غرس حريملاء، من يمينك
خلوّه عنكم شرق وامشوا مع الريع
بيضٍ جواديله، دروب المجاميع
ولا ركبت الريشه على نصف ساعة
شفتوا كبوش مجاسمات الجماعة
تطلعّوا، حامي، بلاد المناعير
ربعي أهل ثادق،، على الشر والخير
وإلى دخلتوا بالسلامة مع السوق
خلّوه، زرفال ٍ ترى العدو ممحوق
تلفون عمّي بلغوّه،، بسلامي
عطوه، مضموني، وغاية، كلامي
لا شك مالي عن تدابير مولاي
ولا نيب عما كتب، في اللوح، طنّاي
وإلاّ الغريب بدار الأجناب مسكين
يومه طويل ٍ عقب فرقا المحبين
ماينبسط يوم ٍ ويضحك مع الناس
لاصار عن شوفة حبيبه طوى الياس
حال النوى والبعد، بينه، وبينه
ما الحروة إنّه، بيشوفه، بعينه
إلاّ بطيف الليل، حروه، يشوفه
وينسى من ظروف الليالي، وصوفه
تمّت وصلوّا عد ماإخضّر من عود
وعداد ما في البر من طير وجنود