كل عيد و انت حبيبتي
ما انتِ امي و انت أختي و انت بنتي
وانت نور العين يا نورا
وانت ست الكل انتي
مش مصدق
مرت الأيام بسرعه
وانت لسه ورده ناديه
ورده حلوه في جنينتي
مين يقول انك دبلتي
أو يقول انك كبرتي
وانت زي البدر في ليلةْ التمام
بدر بينور حياتنا
ويمحي من ليلنا الظلام
والبدور كل اما تكبر
تلقي نورها زاد و نوّرْ.
سمّي ياختي
سمي قولي الله أكبر
من عيون حساد شافوكي
شافوا شعرك كالسنابل
لونه أشقر
والعيون من جنة خضرا لونها أخضر
أما قلبك لونه أبيض كالحليب
صافي و أطهر
سمي قولي الله اكبر
ياااااه يا نورا
لسه شايفك بنت بشريطه ف. ضفايرك
لسه فاكر لما كنتي بتلعبي ويانا حجله
كنتي بتسايرينا و احنا
في الكلام نقعد نسايرك
لسه شايف فيك ماما
ورقة الإحساس في طبعك
لسه شايف فيك بابا
لما كان ينده عليكي تقولي حاضر
واما كنتي بتمسحي في هدومه دمعك
لسه شايفك أحلى بنوته ف. بلدنا
والبنات بيغيروا منك
واما كنتي بين ضلوعك بتدارينا
وبإيديك الطاهره ياختي تطبطبي دايما علينا
انتي لسه زي ما انتي
لسه شجرتنا الكبيرة
اللي بتضلل علينا
انتي دايما نور عنينا.
والنهارده بييجي عيدك
عيد سعيد و تعيشي لينا
يا حبيبتي
ما انتي أمي و انتي أختي و أنتي بنتي