متْأرجحة بين الرجا والخوفْ
ومصدّقة بس الأمل مكتوف
لو بالإدين نضحك مَ كُنت بكيتْ
من غير ضيا.. خطاوينا مش بتشوف
مدّيت إديّا قطعْتْ حبلَك ليه؟!
كسْر القلوب ما له علاج يداويه
الزرع من غير الأديم بيموت
والورد يدبل لو مطر يجافيه
أنا مش مَلاكْ.. بَعْمل ذنوب وبَتوب
والتقوى توب يُسْتر.. ساعات بيدوب
ظُلمَكْ لنفسك زيْ ظُلْم الغير
عَشَمي ف كريم يراضيني ف المكتوب
قلبي ربابة والهوى مواويل
والحُب مش غنوة وسهَرْ بالليل
الحُب رُكني لمّا حيلي يميل
يشفي الجراح والعُمْرُ نبضو عليل