لهفة لهفة اشتاگلك ذاك التراب
وخصلة خصلة اتذكّرك شَعر الشمس
يا غدير المصطفى بذاك الهجير
للحياة عيون منك تنبجس
انت بس انت العذب، غيرك سراب
وكل نقاءه الماي منك يلتمس
يالبياضك عنهم يزيح اللثام
مراية وبنورك صورهم تنعكس
شافوا بوجهك ضوة يگص الظلام
رادوا الموت لضياءك يختلس
وشفنه بيك الضحى وكل الانشراح
واليتامى بشوفتك تحيي النفس
الگال بيش امتاز حيدر عن سواه
گلنه فضل الكعبة شنهو اعلى القدس؟
الله راد تشرف البيت العتيق
واقتراحك بالغدير اعظم درس
حتى من نختار قائد نلگه بيه
من تفاصيلك، ولو رُبع الخمس
وما نبيع اصواتنا وننطي الضمير
لفاسد وسفاح، لو فك مفترس
يحجي بسمك، يدّعي لشخصك وريث
وهو والشيطان من نفس الجنس
كلي يا هو الصادَر حروف العراق
وباع مايه وارضه بالسعر البخِس
تموت كلهه وبيك يتباها الخلود
والمعالي من شموخك تقتبس