قال الوداع، وقلت له بالسلامه
هذي ظروفي دايماً جابراتي
مسحت عبراتي بكف الندامه
وتلّيت من كفه حوايف عباتي
قفى يداري عضةٍ في ابهامه
وقفّيت أداري عضةٍ في شفاتي
وكلٍ رحل يحمل بقايا غرامه
وراحت حياته يوم راحت حياتي
فرقاه ضامتني وفرقاي ضامه
وعلى الله الوالي خلف ذكرياتي
وعقب البطا أرسل عليّهّ سلامه
يطلب ويرجيني يبي تضحياتي
مقدر أضحي بالشرف للملامه
وأمومتي ترفض أيتم بناتي
من ما حصل لقياك يوم القيامه
ماظن تحصل شوفتي يا غناتي!!