وقّف وأنا ساعتي وقفت عقاربها
ثم دار ظهره ودارت دنيتي فيني
تنوف روحي وأمر الله قاضبها
مامت، لكن رأيت الموت في عيني
يقفي وانا اطالع الخطوات واحسبها
وعدّيت لين العد ما عاد يكفيني
أمد ايدي للترايب مع هضايبها
أبا اخفض أي شي يزمي بينه وبيني
حدقت لين احتضن رمشي حواجبها
لين السما حدّرت للقاع في عيني
وغديت أنا البوصلة للي يراقبها
والبوصلة ثابتة فوق اتجاهيني
شمالها والجنوب عيون صاحبها
واليا اتجه.. أتجه ماشي يثنيني
مشاعرٍ داخلي أزريت لا اكتبها
أكبر من انه حبيب ويَب يخليني
وأكبر من الحب والحاجة وراغبها
ماكنه الا مخلّفني وناسيني