ماجيت ادور نقصها يوم غنيت
ولاجيت اقابس شرها من شررها
هذي حياةٍ عاشها الحي والميّت
وسنينها تنقش معالم صورها
يبقى غلاها في صدور الشفاليت
تمطر على الضلع العوج من مطرها
ماقلت ليت ولاتجملت من ليت
دام الحروف تغوص غبة بحرها
وليا ادلهمت سودها بالعفاريت
غزيت رمحي في مواسط نحرها
تفداك ياجزل المضامين كم بيت
شلَت هجوسٍ مايبين ظفرها
من عقبها غنيت بالقاف ماازريت
حتى عميلي يقتنع من خبرها
الصبر مني وان تباطيت ماابطيت
ابدي عليها من مطالع قمرها
مادامني من بادي الوقت مااخطيت
ماهمني لو زاد فيها خطرها
مطنوخ راس ومن رجالٍ نعاتيت
قومٍ ينومس عزها مع فخرها
نحشم قروم القوم ونجنب الهيت
ونعرف عيون الفايته من ظهرها
مانجمع الهزله على كل توقيت
هشة يبوسٍ مات فيها خضرها
وأعيد اقول إني من الشعر غنيت
ماجيت اقابس شرها من شررها