فيني لقيتك وابتدا العمر وياك
واشرق صباحي وابتدا من جبينك
يبهر صباح العشق كامل مزاياك
يتنفسك ملهوف لآخر سنينك
غابت تعاتيم المسا عن محياك
إلا عن التكوين في كحل عينك
تنسج خيوط الشمس قبل اتفياك
قوّ الهجير تبرّده وجنتينك
فيك إندماج الحي ياحي طرياك
ياكثر ناسٍ من زمن مهتوينك
يستوحشك قلبٍ تركته بلياك
واليا سئلته ليه؟ يصرخ رهينك
إقلط تفضل داخل الصدر حياك
مادام كلّي بين نفسك وبينك
حتى الخطا ماقلت لك من خطاياك
زينك جلا عن ناظري كل شينك
ودي ألمّك وأنتثر فيك وأحياك
وأموت بك وتشيلني راحتينك