شاعر تمرر جوف صدره سكاكين
بَرْد التشرد في شوارع مدينه
أَنْحَتْ على رمل الأماكن ذِراعين
واحْطب من اضغاث التمني غبينه
صوتي: تلاوة صوت في نبرة آمين
صمتي: سلام احلام نفسي رهينه
صلّيت في مفرق دعاء المعزين
دافي بلون اغماضة الياسمينه
شفني أقول : الليل حائط محبين
شفني ألون ف: الفضا لي سكينه
أركض ورى تَكّ المطر يابس العين
وانفض غبار الفقد عن وجد طينه
كان العطش عصفور بيد المساكين
وأمي خشوع السجدتين الحزينه
أعلك سواك أصحاب تبغ ورياحين
في دفتر اوجاع القلم ظل انينه
الدرب: تُربه سلك شائك وتخمين
والبحر : نَاسِك في شراع السفينه
شفني أجر اذيال حلمي على وين ؟!
ضايق أجوب الليل واسكن عرينه
عالق وروحي ف الحطب بين فاسين
شف لي وطن واغفى بحنطة حنينه
حاصل عذوق الغيم ما جاب وافين
والموت في بحة رجائي غبينه
ما هي غريبه لا انطفى بيدي اللين
قل: للورق شاعرك سافه سنينه