القحط مالي البلد
و السجن بابه حديد
وادي العزيز اتخمد
و الحلم عنه بعيد
لا يهمه سبعة عجاف
ولا سنبلات يابسات
فرحان بكونه الملك
و الصولجان في الإيد
أحلامه متلخبطة
يصبح ناسيها تمام
والكعكة متظبطة
لازمتها إيه أحلام
خليك يا يوسف كدا
مسجون في زنزانتك
ممدوحنا هيظبطك
و يجيب لك الأحكام
لو هاني مش موجود
محسن ينادي عليه
علشان عيونه السود
يُكرم . دا ابن البيه
والقاضي لو محتاج
شاهد نجيب له شهود
مش قصة، أصل الواد
هيموت يا حسرة عليه
باب السجون عندنا
مفتاحه في إدينا
والمحترم إبننا
نفديه .. وبعنينا
والقاضي من صُنعنا
مستني ع التليفون
يا رب ما نتحرم
من خير أفندينا