اللي بياكل لقمتي... لابد يسمع كلمتي..
لازم يكون بينا نظام
لازم يكون بينا قانون
لازم يكون بينا احترام
وما دمت انا بينكم كبير
يبقى الكبير هو الكبير
لا ليا منكم مستشار
ولا خدت يوم منكم وزير
ولا حتى مجلس نفرده
ناخد وندي وصوتنا يعلا بدون أدب ولا احترام
لمو الكلام
تسمع تطيع تبقى تمام
وهو ده آخر الكلام
آسف قوي
حاولت يابا كتير قوي
اني اقول كله تمام
آكل وانام
وانسى الكلام اللي اتولد فوق اللسان
حتى الحروف اللي انتو لما نطقها
عطر ودانكم يوم انا ما نطقتها
كنتم في غاية الانسجام
ازاي اسيبها تنشنق فوق الشفايف
وابقى خايف
انطق الكلمة اللي ممكن تقطع اللقمة
وابات من غير عشا
يلهي الحشا
واقدر انام
صعبت عليا سكتي
تقلت عليا بلوتي
ولقيتها مش سهلة أكون من غير كيان
ودماغ شايلها منظرة
ما يهمهاش
غير لقمة تكفيها الوجع مع هدمة تستر والسلام
صعبة صحيح
انك تكون حاجة في إيد غيرك مصيرها ف كلمته
علشان بتاكل لقمته
حاولت اكون كائن مكين
كوّني رب الكون.. أكون
مخلوق فريد
فضلني عن كل الخلايق والملايكة بقدرته
وجعلني في الدنيا خليفته بحكمته
ورزقني من فضله الكتير
ما اقدرشي أحصي نعمته
واعصاه... يسامح
وابتعد... يمهل
وأتوب يقبلني.. وتفيض رحمته
وازاي عاوزني بلقمتك
أمسخ واغير صنعته
وابقى خيال مالوش كيان
ولا له لزوم
ولا حتى يملك كلمته
ما اقدرش اكون أبدا كدا
ولا حتى اقدر اكون إلاه
حتى الإلاه مع قدرته
شاءت مشيئته أكون طليق
فاخترت إني أكون أنا
مش حد تاني عشان في ايده لقمتي
ما اقدرش اكون فرعون جديد
ولا أرضى اكون بين العبيد
ما اقدرش ابقى ف يوم كدا...
ولا أقول لأولادي كدا
اللي بياكل لقمتي... لابد يسمع كلمتي!!
لكن هقول
اللي بياكل لقمتي... يبقى شريكي في رحلتي
والرأي شورى باحترام
طبعا يكون بينا أدب
قانون.. نظام
وابقى الكبير... بالحب...
... ويسود الوئام
مش فوضى هي بدون نظااااام
وساعتها بس أكون كبير
واضحك واقووووووول...
... أنااااا الكبيييييير... أنااااا الكبيييييير