الشعر أعزه وأحشمه لا لفاني
ماأعتبره الا واحد من خواني
أهتم به وأروف له وأعتنز به
وأحمى جنابه من شرور الزماني
من بيننا ولف وعلاقة قديمه
اسهر علشانه ويسهر عشاني
ولاجيت له ناصي قضالي لزومي
يقضيه لو انه بزرق السناني
ولو ماانجز الموضوع راضي وقانع
من جهده اللي واضحٍ للعياني
وأنا أشيل الكون كله وأحطه
لاصادفه وقتٍ عصيب ونصاني
اكتب وأصون البيت لامن كتبت
وأطرزه للمخ قبل الاذاني
آخذ بفكر القاري بعالي الجو
وأطهره من غثربات الطماني
لأنه يعكس آرائي بوجه غيري
واياة احد يقرى قصيدي قراني
من شرد بيوت القصيد النوادر
انقاله الجزل الفراد السماني
اسحر بها سامع وشاعر وناقد
ماهو بشرك الا بسحر البياني
وأنفذ بجلدي عن دروب الزرايا
عن الكلام الهزل اصون اللساني
ما أكتب قصيدي لأجل هذي وهذي
والا ارتجي مدة فلان الفلاني
هذا انا والشعر حاله بحاله
اما غشيته يوم والا غشاني
وانا استعيذ بمنتهاي بالهي
اللي على درب الهداية هداني
اعوذ بك يارب من شر نفسي
ويالله من عوج الدروب تحماني