يا كثر ما تحوي دفاتر صدري
من البشر واللي بعيد و داني
عديتهم وإن غاب واحد يطري
وبقى (أبوي) الفارق الوحداني
الميّت ابقى لا عطاني عمري
واللي يمد العمر ما هو فاني
مت وحييت وصار موتك كبري
عايش معي وأحسّه بوجداني
شهادتي تُجرح وهذا عذري
من كم عام ابكتبك ما أمداني
منت بحمل من أجل تقسم ظهري
ذكرك جبل على الورق والساني
لو مت قبل تشوفني ما أدري
أشوف نظراتك بعين أخواني
ورّثتني فزعاتهم من صغري
وأصبحت أسمّيهم أبوي الثاني
وولّيتني من بعد ربي أمري
وباسمك رفعت الراس بين أقراني
وإن مدّو الأشبار يكبر شبري
ويجهر بوجه الخايبين إحساني
وإذا الردى بين الخلايق مشري
ما اشريه لو يطلع علي مجاني
وعرفت لو دامت جروحي تبري
وما أطالع اللي مرّني وعدّاني
وإذا صعب وقتي أنادي صبري
وإذا بكى قلبي تجف أجفاني
والحظ لو وقّف مصيره يجري
الله يذكرني ولا ينساني
الحزن قصه خالده في شعري
لا تضايقك أنا أحب أحزاني
والله يابوي اللي كسرني جبري
مدري من المجني ومنهو الجاني
وصلي بعيني صار يشبه هجري
ما دام بالثنتين صرت اعاني
يبه بهالليلة بزخرف حبري
في ذكرك اللي باقي بوجداني
تبقى معي الين أسكن قبري
وتبقى (أبوي) الفارق الوحداني
27 تموز 2011
كوبنهاغن – الدنمارك