الليل جرح ودمعتين وباب واسوار ورحيل
ينسج من خيوطه حكايات الطريق السرمدي
تفجرّت كل الش ظايا فيك يالجسم النحيل
تسمرّت كل العيون وتوّ رجلك تبتدي
حزن النوارس والبحر والملح والشاطي بخيل
ماجاب لي حورية الاحلام واضنى مرقدي
مديت كفي للنخيل وقلت جودي يا نخيل
واثر النوى يطلع نوى والقاع دايم جرهدي
قلّبت في اوراق ذاكرتي على شيٍ جميل
لقيتها متبعثره بين الثريّا والجدي
قلت احتفل في عيد ميلادي وانا ليلي طويل
شهادة الميلاد ما حصلّت فيها مولدي
كيف استريح وحانة الدنيا لها خصرٍ يميل
قصدتها يا للأسف فالريح ضيعّت جهدي
يا ليل خذني في طريقك واترك العايل يعيل
مادام عذره في خطاياه البساط الاحمدي
يابو عيونٍ تشطب التاريخ.. ويش المستحيل؟
غير اني ارتاح ف حياتي وانت غايب يا بعدي
ادري بقى شيٍ قليل ادري.. بقى شيٍ قليل
ورده وكانت في يدي واليوم.. ماهي في يدي