باب السهر يا ضيقة الصدر مفتوح
تمخطري.. ما حولك الا عيوني
للصمت لذة.. لا غدا للوله بوح
رغم ان صمتي ما يخفف طعوني
بي حزن شاعر وابتسامات مجروح
ولي دمعتينٍ لا سهيت ذرفوني
ما كن لي قلبٍ ولا كن بي روح
ما هوب ذا شكلي ولا هوب لوني
متوحدٍ في غربةٍ ترفض تروح
مستوطنتني كني احيا بدوني!
يا غايبة صوت التناهيد مبحوح
والا الصدى ما مل يجرح سكوني
لا صار باب الصدر للحزن مفتوح
مانيب لايم دمعتي... يا عيوني!