يا قلب زايد ما لك الا تستريح
ويش استفدت من التعب غير التعب؟؟
أشعلت شمعة كانوا الأصحاب ريح
ذبحك برد الوقت شحوا بالحطب
حاولت في وجه الليالي ما تطيح
مالوا عليك بحملهم ل اتفه سبب!!
تمشي لهم بالطيب وجروحك تصيح
يمشون لك بالعكس مع: قلة أدب!
تغفر لهم زلاتهم تدمح تبيح
يستهدفونك بالملام وبالعتب
تضيق فيك وكونهم عنّك فسيح
وشلون تتعجب ولله العجب
مهما تجمّل صورتك تبقى قبيح
ف عيونهم تبقى الغريب عن العرب
جهّالهم لاقصى جروحك تستبيح
وصمتك يسمونه بنظرتهم شغب
يا قلب طاوعني وريّح واستريح
بعض العرب مالك وراه الا التعب