ما يعرف قيمة أرض بلادو

مَا يَعْرَفْ قِيمَةْ أَرْضْ بْلاَدُو

غِيرْ لِّي غَابْ عَلِيهَا وَخْوَاهَا

مَا يَعْرَفْ تَارِيخُو وَ مْجَادُو

غِيرْ لِّي عَاشْ مْجَادْهَا وَبْنَاهَا

بَاشْ يَتْفَكّْرُوهْ نَاسُو وْلاَدُو

لِّي مَا سْمَحْشِي فْنَفْسُو وَعْطَاها

صْبَاحَكْ يَا بْلاَدِي أَنْوَارْ

شَمْسْ وَبْحُورْ وْغَدْرَانْ

نْهَارَكْ يَا بْلاَدِي أَفْكَارْ

وْبِنَاءْ وْتَشْيِيدْ وْعُمْرَانْ

مْسَاكْ يَا بْلاَدِي إِكْبَارْ

عَزّْ وَنْصَرْ دَايَمْ وْأَمَانْ

لِيلَكْ يَا بْلاَدِي أَقْمَارْ

شِعْرْ وْنَغَمْ يْغَازَلْ الْفَنَّانْ

جِيتْ يَا بْلاَدِي نَهْدِي لَكْ عْيُونِي

لْقِيتْهَا ذَابَتْ فَمْحَاسَنْ بْهَاكْ

جِيتْ يَا بْلاَدِي نَهْدِي لَكْ رُوحِي

لْقِيتْهَا هَايْمَة فْعَشْقَكْ وَهْوَاكْ

لْقِيتْ يَا بْلاَدِي لِيكْ حْيَاتِي

وْلَعْمَرْ فَحْمَاكْ فْأَرْضَكْ وَسْمَاكْ

مَا لِيكْ مْثِيلْ يَا بْلاَدِي وْمَصَّابْ

يْحَرْسَكْ رَبِّي مَنْ عَيْنِينْ عْدَاكْ