العصر ما عصر الكذب
كذب كذب
حتى مسيلمة الكذاب خجل
دنقر وتمتم ينتحب
قال يا سلام من دا الكضب
صدق وقول
معقول
وبس
إن قالوا ليك النيل يبس
إن قالوا ليك الفار يخوفها القطط
بس لو قال وحمّر ليها بِس
صدق وقول
معقول
وبس
إن قالوا دولار إبراهام بس بي قرش
وجنيهنا تشتري بيه للمخمل وسجادة وبرش
وحشوا حش
صدق وقول
معقول
وبس
إن قالوا ليك الشمس تشرق من غرب
أسكت وقول
عصر الكذب
والك... يعادي أي ...
صدق وقول
معقول
وبس
إن قالوا ليك الليل نهار
ونهارنا ليل
والقمر بدل مدار
لا كعونجة ولا شليل
صدق وقول
معقول
وبس
ما في داعي للنقاش
يمكن تلاقي نسمة المطر الدعاش
في زمن البرد زمن الرعاش
صدق وقول
معقول
وبس