سمو الكيف يا كيفي يفوق الوصف لا احكي لك
غرام يقند القلب ويقند راس من شاله
قدوعي مبسمك لنّه يفوق اي تمر في جيلك
وعطرك له عبير يفوح بدال الهيل ودلاله
يقهويني شعوري فيك وادوخ ان غبت واجيلك
يسابق خطوتي قلبٍ تركني ومد فنجاله
وانا أتلمس وراه خطاك أدوّر بنك وهيلك
واخاف تضيع والسبة فؤاد يحب هياله
يلوموني بعد شوفك بعد كنّة معاميلك
وأنا سامر مع الشيخ الكبير وحوله عياله
متى ما قلت له يكفي عساه يدوم تدليلك
يقول أبدا محال أقبل وأقوم اعطيه منزاله
ألبّي دعوته غصبٍ علي وأخاف تبديلك
بصكة راس من دلة سمو الشيخ واشباله
ولو ما استبدلك يمكن يعكر شي باقي لك
براسي ساكن وماكن وغيره مالي وماله
ولو هو زال،، يسعدني عليه تضيف تعديلك
وتعطيني الشعور اللي يعيد الجو والحاله
فلا يشغلك أبد راسي وتنسى القلب ويحيلك
عن اللي بداخله لجلك ولا تهتم بأحواله
أنا لي عقل تفكيره معك في صبحك وليلك
خشيره فيك يا عمري فؤاد يغار لو ناله
أحبك كيف في راسي وأحب أصغر تفاصيلك
وأحبك عشق في قلبٍ غرامك كنزه وماله
عرفت الحين يا كيفي سمو الكيف،، أو أحكي لك؟!
غرام يقند القلب ويقند راس من شاله