أبيك تشوفك بعيني وتتعرف عليك اكثر
لعلك تقترب منك وتوضح لجلك الصورة
وابيك تحسك بقلبي وتشعر فيك وتتأثر
لعلك تختبر حبك وتعرف وشهو شعوره
مناي تجرب أحوالي وفِي نفسك تكون ابصر
لعلك تفرح وتبقى معاي الروح مسروره
قسم بالله لو يحصل بتعذر قلبي المضطر
لو انه خاف من فقدك ومن حولك بنى سوره
وتعذر عيني الغرقا اذا لجلك بدت تنثر
دموع الشوق والفرقا وبانت حيل مكسورة
وتعذر قلبي المغرم بطيفك لو خيالك مر
ومن حزنه على فقدك طلع مجبور عن طوره
وقال انه نسى حبك وهو من غيبتك محتر
ونبضاته وله صارت عليك تصيح مقهورة
ابي منك تشوفه بس في وصلك وهو يغتر
ويتباهى امام الناس وكلن يشهد غروره
على مشهد ومسمع من صغير القوم والاكبر
متى محدٍ قرب صوبك يغار ويعلن الثورة
يحرك ثورته عشقٍ ثمين وصعب يتقدر
ويرفع هامته صدقٍ بحبك يشتعل نوره
متى ماهو ظهر للناس تشوف الخلق تتحسر
على حظه بعد ماهو تجلى وأعلن حضوره
حقيقة قلب لا يمكن خيالك يوم يتصور
وش اللي داخله لجلك يخلي النفس مأسورة
حقيقة حب مو عادي غريب وصعب يتفسر
ولا يوصف غموضه شي سوى لا قلت أسطورة
حقيقة صعب تدركها وتعرف نفعها والضر
سوى لا عشتها مرة وشفت الحب وش دوره