كيفن يا جماعة مليشيا ليها في الحساب أيام
تهدم دولة عمرها سبعة آلاف عام
عاااااد يا نااااااس دا اسمه كلاااام
زي الحال دا لا ورد علينا يوم لا حام
نحن أحفاد ملوك من نسل كوش وحام
معروفين أهل شهامة وكرم وإقدام
ما بنهاب الموت إن كشر وشيهو وسام
وما بنتضارى من عدونا ؛ ونلاقيه وين ما كان
حرم نخوض النار إن ولع شرارها وقام
وحرم ساعة الحارة ما تلقونا غير قدام
أهلنا كتير وصونا وقالوا لينا زمان
دام الزول مصيره الموت ؛ أخير الزول يموت عزيز من يموت مُتهان
وتبقى السيرة طيبة والشرف مُتصان
وحاتك إنت يا سودان
قسم بربنا الرحمن
بكرة تطيب جروحك وخرطومنا تبقى تمام
ويجي وقت الحساب ونعرف مين اللى إشتروه وخان
ومين اللى باع ضميره ووطنه بأبخس الأتمان
التاريخ دوام حافل بالعبر وأحكام
رغد الحياة ما بدوم ؛ لو كان شظف العيش دام
والبحيك الشر للناس ؛ لابد ينوله نصيب من شروره كمان
والشايل الصبر رابح ؛ عمره الصبر ما خسر في رهان
وإبن الأصول بصون العهد وأبداً ما بخونك لو مين ما خان
في بذل المودة خلي أخوك وعدوك سيان
جائز بكرة تتبدل الأحوال وتتلخبط الكيمان
وما تخاوي في البشر صنفان العجاف ولئام
وإنزل كل زول منزلته وجازي بالكرم إكرام
وما تبادر بالشينة ؛ وبادل بالمحبة سلام
وأبقى أحفظ للجمايل
وأبقى محمود الشمائل
وديمة نقّي للدواخل
وما تغشك أم قدود
دنيا زائلة ونعيمها زائل