يا ظالمة زينك بشين السوايا
من وين لك قلب على طول جاير
ما أبغى الدوا لاصار جرحك دوايا
باكر على الظالم تدور الدواير
آخر علاجي الكي وأنت الكوايا
للحب عبره وانت قربك عباير
لو هو على زينك بنلقى صبايا
المشكلة بالحب تعمى البصاير
الصبح واضح والخطايا خطايا
والربح من بعض الأوادم خساير
يا نفس قومي عن غرام البدايا
ويا قلب قبل تحب شاور وخاير
أولاد ناس ولا تحب الوصايا
كلن يرى نفسه يعادل عشاير
ما كل قلب ينشرى بالهدايا
ولاكل كسر تفيد فيه الجباير
المعطي الله ما لخلقه عطايا
لو هي على خلقه سقتنا المراير
عزاي رب يعطي حسب النوايا
يرحم عزيزين الذمم والظماير
ناس تدس الهم بين الحنايا
وناس وربي ما درت ويش صاير
هذاك حظه مثل بيض الثنايا
وهذاك حظه مثل سود الظفاير