حبيبتي.. شاعرك لامن لحدك وصل
يخرس مداده وكل اللي عرف يجهله
يظن شعره كمل.. لكن وينه كمل؟
ووصفك الباهر أعجز شاعر يحلله
ياماركة حسن لاتُنسخ.. ولاتُنتحل
كنك درستي المحاسن مرحله مرحله
بنات حوا نُسخ وانتي لوحدك أصل
ياحايزه عنهن تاج الحسن بأكمله
وهبك ربي لي أجمل شي صار وحصل
بعدك وش اللي يتمنى خافقي يوصله
دامي ملكتك وذقت الحب بأحلى عسل
ولقيت في تيه بيدي حبك البوصله
لو أخسر الكون كله امر عادي سهل
يابعد كوني الوسيع بكل مايحمله
مادام حبك غدالي كنز.. قولي اجل..
بعده وش اطلب مكاسب ويش انا اتأمله
يامورقه بالحنايا.. مزهرة بالأمل
يامذهله.. فيك دنيايه غدت مذهله
يافرحة محمد العاشق وفيك إحتفل
وكل شي بعيونك شايفه ماأجمله
القلب يوقف غلا لك ياضيا مستهل
ترقص حناياه نشوى للغلا المقبله
شاعرك مهما ورد عِد القراح ونهل
قدامك.. الشاعر اللي بادي من أوله!