يطول الدرب للحلم البعيد.. وْتستعيد خْطاي
ألم ذكرى العطش قحط المكان وْذابل عْيونه
تولّم لارتحالي ليل.. يوصيني على مسراي
بصحرا موحشه ظلمى بها الأشباح مسكونه
وعى طفلٍ يسولف للخيال الغض باللي جاي
سبح بأحلام وردية.. تغرّد في فضا كونه
رعى قطعانه ب ديره خلا يشديلها بالناي
طفوله بائسه فيها فصول الحزن مدفونه
كبرت وْلا قدرت أستوعب المجهول في دنياي
كأن أحلامي ب يدين الزمن أسرى ومرهونه
تعبت أستنبت مْن الياس فرحة أو أعير بْكاي
.. ولو بسمه يتيمه.. تستقر ب روح محزونه
تعبت أعايش أوهامي وفكري تايه بْلا راي
تعبت الحالم اللي ظن.. لٰكن خابت ظْنونه
غرقت ب حيرتي بين الحنايا أحتضن شكواي
مشاعر تحترق بأقصى فؤادٍ ذاب ب غبونه