يفوح الفكر بوح مهيّله.. والزعفران شجون
ابتقهوى شعر.. لين أثمل بلذة فناجيله
بَقوم ابذر حروفي.. والمعاني طلعها مضمون
انا فلاح.. يدعي تثمر ابياته محاصيله
بحاول استفز الهاجس.. احرث جمره المدفون
بحاول استعير لبائس احلامي فرح ليله
ابرسم هالشعر لوحة من الاغمق ل الافتح لون
واجي مثل البياض الواضح.. الصعبه تفاصيله
انا العساس يابيد الكلام وهاالعطش مرهون..
بوابل من بيان.. وهاالبديع يلاطم بسيله
ابعزف للصحاري ناي واهديها حداي فنون
ابستوقف مرور الركب بعض الوقت واحكيله
ابستحضر من الماضي لواقعنا خيال جنون
وعذراً ياسمو العشق.. ذا فكري وتحليله
ب أصوّت يابني عبس العريقه حبكم مطحون
رحى الحرب استدارت والعدو جوّد محابيله
تنادوا عنتره: يالفارس المغوار منك العون
وهذا عنتره.. ضاع بثغر عبله وتقبيله
واصوت يابني عامر في ليلى كم غدا مجنون
تفطّر قلب قيس وماسوى التوباد يشكيله
دروب العشق مامرك سوى هاالشاعر المفتون؟
كثير اللي عشق واللي تعب واللي سهر ليله
ولكن من نزف حرفه عزف بوحه بأرق لحون..
ولو غنّى حزن.. قاريه يطرب من مواويله