بس تعلّمنا نلوم الدمع وشراع السفينه
وا نتجاهل زارعين الهم واسباب الجراح
علميني/ وش يريد الشوك/يالوردة الحزينه
اكثر من اني بلعت الضيم وبحجة مزاح
كل ما اوْجستي وجع قلبي وقلتي لي هوينه
تصفر ظلوعي مثل زلٍ تعاتبْه الرياح
أمهليني ابلع العبره وقوليْ الله يعينه
هالمحارب من محطة ليا محطه ولا استراح
واتركيني اسعى يم الرزق مليت السكينه
في زمان الجوع الاغبر تصبح اللقمة سلاح
بكره ترميني الشواطي مدري وين بأي مدينه
آنا من ربي خلقني طير مكسور الجناح
اعذريني ماتركت لإصبعك دبله ثمينه
وعذري اقبح من ذنوبٍ مايجملّها السماح
وان سألك الدمع بالليل العتيم وقال وينه
ومابقى للصبر في قلبك على الشده براح
قولي راح وكان حلمه كل حلمه ياسمينه
راح مطحون برحى الايام ذرتّه الرياح
راح يستجمع شتاته صبره يعزي حنينه
فارسٍ خانه. جواد الحلم وادمته الرياح
انتصرنا بالبداية كنا نحسبها هوينه
وانهزمنا وكل شيّ باخر المشوار راح
مثلنا حتى يعيش وتلمح الاحلام عينه
يبتدي عمره كفاح وينتهي عمره كفاح