احلّق على متن السما والخيال جناح
خيالي لياضاق الفضا لك يوديني
لك اسرج خيول الفكر والهاجس الجماح
خيالي هناك بعيد يمّك يسريني
احث الخطا لك كلّما شفت برقٍ لاح
احس انّ هذا البرق بالذات يعنيني
عيوني جزيرة حب واطيافك السواح
على عيني اطيافك تهافت على عيني
اشوفك هنا وهناك وهناك كيف ارتاح
وفي كل حالاتي خيالك مخاويني
غرامك مدينة غامضة مالها مفتاح
لها سور بابه نور دايم يناديني
ليا رحت ناداني ولن جيت صد وراح
واعاف الهوى واقول حظي معاديني
اليا طال صدّك طار سرب الحمام وناح
وذبلت غصون الشوق داخل شراييني
اعدّ الخرز مرات يانكبة المسباح
نكبته وقطّعته وهو قطّع يديني
على شاطي الحلم انتهت رحلة الملاح
وداعاً وداعاّ حلمي وماضي سنيني
هنا يمكن اودّع جروح الهوى ياصاح
واغيّر مساراتي واغيّر عناويني
اليا كان هذا البنك يخسر بدون ارباح
ولوكان ديكوره ورود ورياحيني
واليا كان هذا الدرب عصف ومطر ورياح
رجاءً رجاءً غادتي لاتحبيني
انا عاد ناقصني سهاد وسهر وجراح
تكفيني جروحي جروحي تكفيني