صاحبي يافرحة العيد بعيونك
انت عيد العيد نوره ومصباحه
نبضي وروحي وعيني يهنونك
عيدك مبارك عسى تكمل افراحه
اشهد ان العيد اخذ لون من لونك
شفت ملحك في حلاياه وملاحه
المشاعر ساع تمشي يزفّونك
ودها تفرش لك الارض طراحة
انت شمس الكون والغيد من دونك
من زمان اخذت قلبي ومفتاحه
لوتنادي قالت الروح ياعونك
جاك جيش الشوق فزّاع بسلاحه
وان تروح بعيد الاشواق يقفونك
طايرة فالجو والبحر سباحة
والخفوق المهتوي يعزف لحونك
مع تقاسيم الوله ينزف جراحه
مير خاف الله لاتخلف ظنونك
انت روس اموال شاعرك وارباحه
مستحيل انساك وجفاك واخونك
لوطلع فالغصن عشرين تفاحة
شوف رعشة خافقي يوم يطرونك
تقل طيرٍ حايمٍ يكفخ جناحه
العب براحتك واعبث على هونك
ماحدن غيرك تربّع على الساحة
في صحاري مهجتي توّرق اغصونك
والقفار الجرهدي تنقلب واحة