عطني حنانك دامني اليوم محتاج
لا تمنعه يا منوة الروح عني
لا تقول باكر قلبي اليوم وهّاج
كنّي على جمر اللواهيب كنّي
الشوق سيف وخافقي جرح ثجّاج
يسطي بحشاي ويسرق الروح مني
عطني ودادك وارمني وسط الأمواج
خلني أصارع فيك حبٍ فتنّي
ساهر وأراقب طالعي بين الأبراج
مرة أنوح ومرةٍ لك أغنّي
لك في خفوقي خاتم الشوق والتاج
ولك من ضميري كل شعري وفنّي
روحي غدت في عالم الحب معراج
تحيا على حلم وخيال وتمنّي
اسعف غريمك يا منى النفس بعلاج
لا لا تخيّب فيك يا زين ظني
خذني ف حبك كون لي سور وسياج
منْك الحنان وصادق الحب منّي