تعلّمنا من أقدار الحياة وجرحها خيرة
ولو يقسى علي وقتي، عزومي دايم الأقوى
أبعطي وإن نكر جودي غريرٍ تشهد السيرة
وشمسي ما تغطيها ظنون وناس تتهقوى
يفوز الطيب في قلبي بلا شك وبلا حيرة
وقلبٍ ما لقى صدق الوفا، يا علّ ما يهوى
كثير أغفر ومن يخطي علي، ما يهمّ تبريره
عساه بغفلته يختال، ما لي في العتب سلوى
قليل الحظّ ما أنكر وحزني صعب تصويره
ولطف الله يواسيني، وهي دنيا ولا تسوى
حبيبي ياللي علّمتك لذيذ الحبّ والغيرة
تعلّمني أنا الخذلان ليه وتقتل النجوى!
تذكّر وأنت تتندّم، جزى الندمان تفكيره
يطول الليل يحكي لك صداك وظلّك الشكوى
تمنينك غرامٍ خالدٍ مُلهِم بتأثيره
ولكنك تبيها قصةٍ لأهل العِبَر تُروى
ترى من ضيّع أحبابه، غريبٍ ضيّع الديرة
إذا يقوى على الغربة، على النسيان ما يقوى