غني لخالد كل ما عينك تويق
هذا مكاني وانت هذا مكانك
من زفرة أنفاسك ليا نشفة الريق
رحلة عذابي وصحّ الله لسانك
ياللي بغيابك صارت أيامي السيق
م أرضى انكسارك في عيوني وهوانك
أرقى بوفايا فوق روس الشواهيق
قلبي اللي حب ما يوم خانك
مثل أفروديت ومثل أبولو للإغريق
كنا سوى من قبل تصدر بيانك
غدرتني من بعد عهد ومواثيق
ذبحتني من بعد وعدك وأمانك
ما يحتمل ما فات زيفٍ وتلفيق
كل شيء سويته معي أمس دانك
ولا تجهل علومك جميع المخاليق
أرخصتي اللي عز قدرك وشانك
حدتني أفعالك على غير ماطيق
نار الفراق ولا المذلة بجنانك
وقفّت من دونك سطر كني طويق
وأنتي تمنّي عالمحب بحنانك
غيبتك وحضورك إهي سبة الضيق
ما كنت أنا كونك يا بنت وكيانك
من ضحكة الشامت وكذب الزناديق
واللي على فراقي سعى وخبث عانك
يقهرني جحودك يا أم العشاشيق
للي مضى وما كان تِخفي امتنانك
ما ودي افتح مغلقات الصناديق
كنت المبدا وكل وقتي وزانك
لكن كذا الدنيا حظوظ وتوافيق
في يد غيري ليد غيره عنانك
غني لخالد كل ما عينك تويق
هذا مكاني وأنت هذا مكانك