ماجيت اهلهل قصيدي طالب الشهره
تسليط الاضواء ماهو من قوانيني
ساحات الاعلام تدعيني على السهره
وانا اعتذر لانها ماهي ب تعنيني
انا اكتب الحرف لجل اروض الفكره
اوصف بها اللي تركني وينه وويني
راح وتركني وانا عايش على ذكره
قلبي يحبه قبل ماشافته عيني
الجادل اللي بياضه خالط الحمره
وعيونه الخرس تذبحني وتحييني
اطهر من الماء حتى الماء في طهره
مهما شربته ضما ماعاد يرويني
يرويني اللي شفاهه كنها خمره
شكيت عنده ضماي وقام يسقيني
اقفى وانا اقفيت والحسره ورى الحسره
اقوى من السم تمشي في شراييني
ماغير افرّك يديني وانثر العبره
ابكي عليه واشوفه قام يبكيني
كيف اجعل الامس عندي ينقلب بكره
اعيش به يوم واترك باقي سنيني
نومان
سحل