تناسيني على كيفك انا قلبي سجل إعجاب
بدوّن كل شيً عنك وانسى اني عرفتك يوم
مدام ان الهوى حسره وحزن وكل ابوه اتعاب
أجل والله لاقول انه طبيعي وكل شي مقسوم
ماودي اتعب بعد اكثرماودي افتح لحزني باب
ماودي افكر بساعه من الظالم من المظلوم؟
كبرت وراحت سنيني وحتى الراس كله شاب
أعوّد؟لا حشا ماظن اعوّد للجفاء واللوم
غرامك في الحشا كنّه حقيقه فص ملح وذاب
كأنه شخصً توفى ومن ينشد عن المرحوم!
صحيح اني عشقتك حيل واذكر يوم كنا احباب
ولكن مااستفدت الاّعذاب وكل ساعه شوم
اجل ماارتحت في حبك صراحه لين صرنا اغراب
عرفت ان الهوى كله ياحاكم ياتجي محكوم
تعالي شوفي بعينك وش اللي عن هوانا غاب
تقولين الغلى يمكن.تقولين الوفاء معدوم
تقولي جرحك الدامي اقول لك لاوربي طاب
تقولي كيف؟اناآقول لك نسيته واحترفت النوم
تقولي حبي بقلبك اقول بصدق كان إعجاب
ولاانكر قيمتك عندي ولكن كل شي مقسوم