الدمعه اللي صابها البعد بالنوح
غنّت على لحن المفارق هدبها
ما حنت لرغبة كسيرن ومجروح
قفّت وأنا صدري زفيره لهبها
حتى الحمام أسراب تتعانق الدوح
تشكي ظماي وتنتحب من عطبها
ماعانقت في زحمة الناس مصلوح
ياكود ليلن عاث ساعة نحبها
والدمعه اللي أنهكت قلب مجروح
ماهو بكيفي غصب صرت ارتكبها
منهوك كلي والجسد مابها روح
كن الظما لف الديار وحطبها
حتى السنين اللي بها ظلم وشْحوح
نامت على حدب الضلوع ونشبها
يا موقدين الصمت في ساعة البوح
حزن الموادع دمع عيني سكبها
جت ترتجف بي زهرة البعد وتفوح
تبكي الذبول اللي قدرها كتبها
والدمعة اللي صابها البعد بالنوح
غنت على لحن المفارق هدبها!