مجنون حزنٍ شرب دمعي بفنجاله
خلّف بصدري جفاف الموت وطيوره
كني وأنا أبكي و قلبي يدفن بجاله
طفلة كسرها اليُتم..وتصيح مذعوره..!!
كذاب صبحٍ وعد حلمي ولاجاله
كذاب حبٍ..دروبه دوم محظوره!
ماعاد أبا شي..مل الليل مواله
بروازصمتي..فضح في عيني الصوره!
خلوني اروح بين الغيم رحاله
لاتنطرون ألتفت.. واقول معذوره!
خلاص ماني على صبري بمحتاله
باروح..وادري خطاوي القلب مجبوره
لكن..وأش ابغى مادام اللي اتعناله
ماهمه أن عشت والامت مكسوره!
قولوا له اشتقت..واني لوعلى باله
ابقى الوفا اللي حضنه وقدّر شعوره
أغليته..بصدق..نبضٍ..كان يحياله
وشفته صباح العمر..نوره وديجوره!
قولوا له أن جا..بيوم وسركم حاله
إني لحاله أكيد أكون مسروره!
وإن كان قلبه وحيد وهالحزن هاله
أكيد أنا..بارتعب..من حزنه و جوره
قولوا له انه بقلبي ماحدٍ طاله..
وإني رحلت وطريقي منه ممطوره!