أهديتني حبٍّ سكن داخل الروح
عشت بْربيعه أعذب العمر ويّاك
دامك نويت تروح، بس قبل لا تروح
كمّل جميلك وأهدني قلب ينساك
محال قلبي تتركه ينزف جْروح
ويصبر له أيامٍ وينبض بليّاك
وشلون يقبل كلمة أبعد وبس روح
وياما سمع كلمة أحبك وحيّاك!
لا تظنّ قلبي طفل بمهاد مطروح
يكبر وينسى ما مضى من سواياك
من عقبكم لا شكّ ما فيه مملوح
يرضي غروري مثل ملحك وشرواك
لا ولّوا أهل الدار من غير مصلوح
يموت ورد الدار وتظلّ الأشواك
ويبقى غبارٍ يوصف الحال بوضوح
تخيّل أن الدار هذي حناياك!
وإذا بعد وصفي تبي تروح، مسموح
عسى السنين تنسّي القلب ذكراك