كنت أسافر بس لحالي

كنت أسافر.. بس لحالي

كلّ همّ الليل.. شلته فوق ظهري

وانكسار الأرض..حسيته بصدري

كنت أدري..

ما أشوف اللي قبالي

المهم اللي في بالي..

بس أسافر

كنت أسافر..

كنت ألبّي صوت ناداني

للي أبعد.. من مدى جرحي

للي يقدر.. بس على فرحي

كم نسيته..كم جرحته حيل..

لا قسى.. ولا طاع ينساني

انتظَرني.. انتظرته

والنوى بحضنه كسرته..

يوم أسافر

كلمتين..

العتاب المرّ..

ذاب في كلمتين

نظرتين..

كلّ همّ الليل..

ضاع في نظرتين

لمستين..

انكسار الأرض..

زال في لمستين

ليلتين..

كلّ هذا الحب..

صار في ليلتين

واختلط عند الرجوع..

المطر ويّا الدموع

ورحت أسافر